پوپولیست بیر ایستیقلالچی نین گؤرونتوسو
یونس شاملی
ائلدار بئی قاراداغلی «سول فئدئرالچیلیق» عنوانی ایله بیر یازیدا، بیلینمه ین (نامعلوم) بیر شخصی، نظره آلاراق فئدئرالچی دوشونجه سینی اه له شدیرمه یه چالیشیب. او بو یازیسیندا گرچک لردن اوزاقلاشیر و اوخوجولارین قالانلیق لارا سوره کله ییر. بو یازی دا ائلدار بئي فئدئرالچی لاری «دوشمن کؤله لری» کیمی قلمه وئرمک له، اوخوجولارینین گؤزلرینه توپراق سه پمه یه چالیشیر. من بو یازیدا ائلدار بئی نئجه اوخوجولارین قاندیرماغا چالیشماسین قیسساجا آیدینلاتماق ایستیره م.
«ائلدار بئی قاراداغلی اهانت دولو یازیسیندا فئدئرالچیلاری تورک میللی حرکاتی سیرالاریندا «سورونه ـ سورونه اه زیلن بیر کسیم آدلاندیریر! و حتتا اؤزو بو آدلاندیرمانی قریب سانیر! و یازیر کی؛ «بیر آز قریب و کلاسیک اولمایان آنلاتیم اولدو! اؤزوم ده قبول ائدیرم!»! باشقا دئیشله او فئدئرالچیلاری آشاغالاماغا چالیشیر! بو شیوه ده یازماق بیر اینسانا یاراشمایان، و مسئله یه غیرمدنی و حتتا غیر اینسانی بیر یاخینلاشاقدیر! آشاغالایان دیل، ائلدار بئی ین بو یازدیغی متن نین تامام سطیرلرینده گؤزه چارپیر. آشاغالاما، اساسیندا گئریه قالمیش توپلوملارین اینفئکسیالانمیش کولتوروندن قایناقلانیر. بو دیل گونئی آزربایجان و ایران دا یاشایان تورک لرین دیل و یازی شیوه سی اولمامالیدیر. بو دیل، بیزیم میللته و مدنی بیر توپلوما یاراشمییان بیر دیلدیر.
یالان یالنیز آلداتماق اوچون دور؛
ائلدار قاراداغلی یازیسیندا فئدئرالچیلارین ایستفاده ائتدیگی تئرمین لری و شوعارلاری ایضاح ائدنده، بیر سیرا قوندارما و یالان تئرمین لری فئدئرالچیلارین آدینا یازماغا چالیشیر.
ائلدار بئی یازیسینی بئله دوام ائدیر؛ «میللتین قازاندیغی تئرمین: نه آز، نه چوخ "آذربایجان میللی حرکاتی"! / سول فئدئرالچی کسیمین مئیلی جه:"ایران و آذربایجاندا تورک خالقینین میللی-دئموکراتیک حرکاتی"!» ـ سیتادین سونو
میللتین قازاندیغی آدلاندیریلان «آذربایجان میللی حرکاتی» هئچ ده میللت ین قازاندیغی بیر تئرمین دئیلدیر. بو یالنیز ائلدار بئی ین و عمومیتله تورک میللی حرکاتیندا فعالیت ائدن ایستیقلاچی لارین ایشله تدییی بیر تئرمین دیر. ائلدار بئی دن سورماق لازیم دیر کی، عجبا بو تئرمینی هارادا میللت قازانمیشدیر؟ بو تئرمینه بیر مجلیس ده قرار وئریلمیشدیر می؟ یوخسا ائلدار بئی ین ذهنییتی «میللت قازاندیغین» قوندارمیشدیر ؟
تورک فئدئرالچی لار ایشله تدیی تئرمین لری، آلدادیجی فورمادا، میللت ین آدینا یازمازلار. بلکه بو تئرمین لری تانینمیش حقوق و سیاسی ادبیاتا دایاناراق، اویقون گؤرورسه لر ایستیفاده ائدیرلر. نمونه اولاراق، آدین چکدیمیز تئریمینه
فئدئٰرالیست لر «آذربایجان میللی حرکاتی» یوخ، بلکه «تورک میللی حرکاتی» آدلاندیریرلار. چون کو «میللی حرکات» جغرافیانین (آزربایجان) حرکاتی دئیل، بلکه میللتیمیزین حرکاتی دیر و میللتیمیزی میللی کیملیی نین آدی آزربایجان دئير، بلکه «تورک» دور. «آزربایجان» تورک میللتی نین میللی آدی دئیر، بلکه اونون میللی وطنینین آدی دیر.
بیرده بونو دئمه لییم کی، «آذربایجان» سؤزو تورکجه ده عرب الیفباسی ایله یازیلیرسا، اونو فارسجا «ذ» حرفی ایله یوخ، بلکه تورک دیلی اورتوقرافی سمیناری قرارلارینا گؤره تورکجه ده «ز» حرف ایله (آزربایجان) یازیلمالی دیر. آمما ائلدار بئی یازیسیندا تورکجه ده «آزربایجان» سؤزونو حالن فارسی الیفباسی ایله «آذربایجان» یازماقدادیر.
ائلدارین فئدئرالچیلارا قارشی تخریبات کاراکترلی یازیسینی بئله دوام ائدیر؛
میللتین قازاندیغی تئرمین: تورک میللتی! / سول فئدئرالچی کسیمین مئیلی جه: ایرانین تورک خالقی!» ـ سیتاتین سونو»
ائلدار بئی گؤردویونوز کیمی گینه ده «تورک میللتی» تئرمینین میللتین قازانجی آدلاندیر و سول فئدئرالچی لارین آغزیندان یالانجا «ایرانین تورک خالقی» تئرمینین ایشله دیر! ائلدار بئی بو یالانلارلا اوخوجولارین آلداتماغا و جایدیرماغا چالیشیر و بیر حرکت له حقیقی بیر پوپولیست اولماسین نومایش ائتدیریر. یوخسا من بیر سول فئدئرالیچی اولاراق هئچ زامان هئچ یئرده «ایرانین تورک خالقی» تئرمینین نه ایشله تمیشم و نه ایشله ده رم.
ائلدارین پوپولیستیک یازیسی سون بولمور و سول فئدئرالچی لارا قارشی تخریبات دوام ائدیر.
من بو یازی ایله، شبهه لر یارانماسین دئیه، آلدادیجی دیل و کولتور ادبیاتیمیزدان اوزاقلاشسین دئیه، پوپولیزمه مئیدان وئریلمه سین دئیه سول فئدئرالچیلارین بیر نئچه اؤنملی تئرمینلرین بو یازیدا ایضاح ائتمه یه چالیشیرام و ائلدارا توصیه نی ائدیرم کی اوخوجولاری ایله صمیمی اولماق اوچون، یازماغا تشبوث گؤسترنده قلمه حؤرمت و اوخوجولارینادا سایقینی اونوتماسین.
سول فئدئرالچی لارین سیاسی ساحه ده ایشله تدییی بعضی تئرمین لر بئله دیرلر؛
میللتیمیزین میللی کیملی ینین آدی؛ تورک دور. آزربایجان تورکو و یا آذری و یا آذری تورکو دئیر. یالنیز تورک دور.
میللی دیلیمیزین آدی؛ «تورکجه» و یا «تورکو» دور. آزربایجان تورکجه سی، آذری و یا آذری تورکجه سی دئیر یالنیز تورکجه یا تورکو دور. ایندی بعضن آزربایجان دا دانیشیلان شیوه نین آیرینتی سین گؤسترمک ایستین لر اونو «آزربایجان تورکجه سی» ده آدلاندیرلار. آمما دئدییم کیمی بیزیم میللی دیلیمیزین نئت آدی «تورکجه» دیر.
و میللی وطنیمیزین آدی؛ آزربایجان دیر
میللی آزادلیق حرکاتیمیزین آدی؛ مضمون باخیمیندان «تورک میللی حرکاتی» دیر. حرکاتیمیز بوگون بین الخالق آلاندا دوزگون گؤرونسون دئيه، دونیا اوزره ایشله دیلن سیاسی دیل و دئموکراتیک ادبیاتی مولاحیظه یه آلیرساق «تورک ـ آزربایجان میللی - دئموکراتیک حرکاتی» بیزیم میللتین سیاسی حرکاتینی آدلاندیرماق داها دوزگون اولور. بورادا میللی ـ دئموکراتیک آدلاندیرماق حرکاتین ایچ مضمونون عکس ائتدیرمک و آشیری میللت چیلیک دن آرا آچماقدیر. دئموکراتیک سؤزجویو یالنیز سؤز یوخ بلکه حرکاتین دئموکراتیک مضمونون گؤسترمک دئمکدیر. بوگون دونیانین هر بیر بوجاغیندا «میللتچیلیک» بیر آشیری و آنتی دئموکراتیک آنلایشی ایفاده ائدن بیر قاورام تانینیر. بونا گؤره، حرکاتیمیز ایچه ریده و بین الخالق آلاندا چکیجی و موعاصیر اولماسین گؤسترمک اوچون حرکاتیمیزی مضمون جهتیندن «میللی ـ دئموکراتیک» آدلاندیرمالییق.
ایران دا یاشایان اینسانلار، اونلارین ائتنیک/میللی کیملیینه باخمییاراق او اؤلکه ده (ایران دا) وطنداش سایلیرلار. ایران بیر نئچه میللت لی (کثیرالملله) اؤلکه دیر. تاسفله ایران دئولتی اتنیک تیپولوژوسو بیر میللت لی (فارس) دئولت ـ میللت دیر و بونا گؤره ده غیرفارس میللت لر داخیلی بیر سؤمورگه چی سیاسته معروض قالمیشدیرلار. «تورک میللی حرکاتی» بو میللتی اسارت دن قورتارماق و عمومیت له بیتیشمیش تورک بؤلگه سینده (گونئی آزربایجان و اونا باغلی باشقا تورک توپراقلاری) میللی موقدراتینی تعیین ائتمک حاقینا مالیک اولماق اوچون، وطن ده میللی و دئموکراتیک دئولتین برپا ائتمه سینه یؤنلنمیش بیر حرکاتدی.
فئدرالچیلارا گؤره، گونئی آزربایجان دا و عمومیت له ایران دا یاشایان تورک لر اوچون بوگونکو شرایط ده «ایستقلالیت شوعاری» بیزیم میللتیمیزین او شوعارا حاضیرلیغی اولمادیغی اوچون بیر آشیری و غیر رئال شوعار حئساب سانیلیر. فئدئرالچیلار ایرانین بوگونکو شرایطینده، ایران دا فئدئرال جمهوریتی برپا اولماسین بیر سیاسی آماج کیمی حئساب ائدیر و چالیشمالارین اؤ جهتده یؤنله ندیریر.
ائلدار بئی قاراداغلی، بیلمیرم نه دن، تورک میللی حرکاتی نین سیرالاریندا اولان فئدئرالچیلارا قارشی آلدادیجی و قارالاما کامپانیاسی آپاریر. او آدین چکدییم یازیدا اؤزونو پوپولیست لرین حقیقی تمثیلجیسی کیمی اوخوجولارینا تانیتدیریر. او بو یازی سی ایله «تورک میللی حرکاتی» سیرالاریندا گرگین لیک یارالتماغا و فئدئرالچیلاری حقارته معروض قویماق لا ایران دئولتینین ایستک لرینه خیدمت ائدیر.
سول فئدئرالچی لار نئجه دوشونورلر و یا ایستیقلال شوعارینا بوگون نئجه باخیرلار دئیه، بیر نئچه یازنین لینکینی آشاغیدا اوخوجولاریمین خیدمتینه سونورارم؛
بسوی کدامین فدرالیسم؟ ـ یونس شاملی
چرا طرفدار فدرالیسم هستید و نه استقلال؟ ـ یونس شاملی
فدرالیسم شعار ضروری مرحله کنونی ـ یونس شاملی
یونس شاملی
۲۰۱۷/۹/۲۷
یازیمین قایناغی؛
سول فئدرالچیلیق ـ ائلدار قاراداغلی
قایناق؛
آراز نیوز
http://www.araznews.org/fa/?p=38851
http://www.araznews.org/fa/?p=38851
