اعدام جزاسی تورکیه نی هارایا آپاریر؟

 

  یونس شاملی

تورکیه نین 15 تئموز داربه (حربی چئوریلیش) تشبوسو تارتیشمالی اولان "اعدام جزاسی"نی بیر قونو اولاراق کامو اویونا (افکار عمومی یه) داشیمیشدیر و تورکیه نین موباحیثه لی جمهور باشقانی طایب اردوغان آمئریکانین سی ان ان له دانیشماسیندا "مجلیس دن ائعدام جزاسی قراری چیخارسا آلتینا ایمضامی آتارام" دئمک له "اعدام جزاسی" نین تورکیه یاسالارینا گئری دؤنمه سین دستک له دی. طایب اردوغانین سون اون ایل ده بیر آتوریتر جمهورباشقانینا چئوریلمه سی بوگون غرب و حتی شرق دونیاسیندا گور بیر سسله هایکیریلمادادیر. بو گلیشمه تورکیه نین سون اون ایللرده کی دئمکراتیک لشمه سیماسینا زیان وئرمه کده دیر. اردوغان ین آتوریتر داورانیشی هم ایچ و هم دیش (خارجی) سیاستین ده یئترلی قدر تورکیه نی گرگینلیک له ره و سیخینتی لارلا سوروموشدور.

"اعدام جزاسی" مودئرن و دئمکراتیک دونیادا گه ره کینه قدر موباحیثه اولونموش و بو قونودا گئنیش آراشدیرمالار آپاریلمیشدیر. اعدام جزاسی عمومیت له قانون آدینا جینایت ایشله مک و اینسانین حیاتینا سون قویماق دئمک دیر. بو گونه قدر حکومت لر "اعدام جزاسی" آدینا سایسیز- حئسابسیز اینسانین جانین آلمیشدیرلار و تاریخی آچیدان، اعدام اولانلارین یاخین لاری یعنی  میلیونلار اینسانین یاشامین آجی و کده رلندیرمیشدیر.

 

کیمسه نین، کیم و یا نه اولورسا، بیر اینسانین حیاتینا سون قویما قرارینا حاققی یوخدور و اولاماز. اینسانین حیات حاقینی اوندان آلماق هر نه موتیواسیونلا و هانکی قانون لا اولورسا اولسون، اونون آدی جینایت دیر. "اعدام جزاسی" اینتقاما، نیفرته و شیده ته دایانان بیر جزا دیر. دئمکراتیک و اینسانجیل بیر دوشونجه آلانیندا، دئمکراتیک بیر دئولت یاپیسیندا قانونلار هئچ زامان اینتقاما، نیفرته و شیده ته سؤیکنه بیلمز.

 

دئمکراتیک توپلوم، مودئرن دئولچیلیک و دئمکرات بیر حاکمیت "اعدام جزاسی"نی اؤز قانونون دا یاشادا بیلمز. هله کی "اعدام جزاسی"نی قالدیران تورکیه دئولتی بو جزانی گئری قایتاریرسا، تاریخی یؤندن تورکیه یه قالان اؤزو قارالیق، آپاریلان سیاست گئریه قالمیشلیق و بو قانونون گرچکلشمه سی اینسانا قارشی جینایت ایشله مک دئمکدیر.

 

"اعدام جزاسی" تورکیه نین یاسالاریندان، ایللردیر، دوزگون و دئمکراتیک بیر قرار اولاراق، قالدیریلمیشدیر.  اعدام جزاسینی گئری قایتارماق، تورکیه نین دئمکراتیک گلیشمه سین دایاندیرماق و بو اؤلکه نی نئچه اونلار ایل لر گئرییه آپارماق دئمک دیر. مودئرن تورکیه نین جمهور باشقانی اولان، طایب اردوغان ین "اعدام جزاسینا" مثبت یاناشماسی و او جزانین گئری دؤنمه سینه ایمضا آلتماسی چوخ قورخونج و تورکیه نی مودئرن دونیا چاپیندا بیر اوزو قارا دئولته چئویرمک معناسیندادیر. اردوغان ین اعدام جزاسینی گتیرمه تشبوسو، تورکیه ده موخالیفته تهدید آلتی و یئری گلدیکده اونلارا قارشی بو جنایتی گرچکلشدیرمک معناسینا گلیر.

اعدام جزاسی تورکیه نین یاسالارینا هئچ زامان گئری دؤنمه مه لیدیر.

20160810

دئموکراسی میتینگی و ترکیه نین گله جه یی

   یونس شاملی
بوگونون دئموکراسی میتینگی اؤزلویونده چوخ اؤزل بیر میتینگ اولدو. بئش میلیونا یاخین اینسانین بیر آرایا گلمه سی، داربه (حربی چئوریلیش) ایله مخالیفت گؤسته مه سی، حقوقی دئولتچیلییه اینام گؤسته رمه سی و دمکراسی نین تورکیه ده گلیشمه سینه دستک وئرمه سی و... بو میتینگی تورکیه تاریخی نین بیر اونودولماز گؤنونه چئویرمیشدیر. بو میتینگ ده سیاسی لیدرلرین ایفاده طرزی، صنعت چی لرین قاتقیسی، میللی دویقولارین قاباریجیق شکیلده مئیداندا اولماسی میتینگین آتموسفرینی دویقوساللاشدیرمیشدیر. هر کس بیرلیک دن و قارداشلیق دان دانیشیر و هر کس تورکیه نین گؤجلو بیر دئولت کیمی مئیداندا اولماسینی آرزو ائدیردی.

تورکیه جمهوریتی نین تاریخینده بیر چوخلو فلاکت یارادان داربه لر سونو 15 تئموزون داربه تشبوسونو سونوجو، تورکیه ده داربه سورونونا بیردفعه لیک سون قویموشدور. بو گونون دمکراسی میتینگی تورکیه تاریخینده داربه سورونونا همیشه لیک چؤزموشدور. البته کی داربه تشبوسو تورکیه نین ایمئجینه دونیا آلانیندا و حتی تورکیه ایچینده چوخ جیددی ضرر وورموشدور.  آمما بوگونون میتینگ تورکیه دئولتی نین گوجلو بیر بیچیمده مئیداندا اولماسینین آرزو و دسته یینی ده نومایش ائتدیرمیشدیر. 


البته بو میتینگه اسکیکلیلری گؤزدن آتماق اولماز. تورکیه نین بؤیوم میللی مجلیسینده اولان دؤردونجو پارتیا، خالقلارین دمکرات پارتیاسی، ه د پ، بو میتینگده ایشتیراک ائتمه میشدیر. بو طورلو حرکت لر تورکیه دمکراسی سینین آخسالتماسیندان و اونون حقوقی بیر آچیدان هر بیر سیاسی پارتیانی اؤز ایچینه آلماماسیندان خبروئریر.

بوگون دمکراسی میتینگی ایله تورکیه دئولت چیلیگی خالقین گئنیش دستگی ایله گوجلندی. آمما بو حاکمیتین گؤجلنمه معناسینا گلمز. باخمییاراق کی بوگون دمکراسی میتینگی کامو اویوندا آ ک پ نی گوجلن دیرمه ده جیددی بیر رول اویناییر. بو میتینگ دن سونرا طایب اردوغان نئجه اؤزون آپاراجاق دئیه جیددی سؤزقونوسودور.

 

بوگون تورکیه گوونسیزلیق دان و ائعتبارسیزلیق دا و هابله خاریجی سیاست ساحه سینده گرگینلیکده دیر. تورکیه نین ایچینده پولاریزاسیون و قوتبلاشماق بو اؤلگه نین ان اؤنملی سورونلاریندان بیری سایلیر. کورد بؤلگه لرینده ساواش تورکیه نین سیاسی گوجون سارسیلتماقدادیر. بوگونون اینانیلماز میتینگی یوخاریدا سیرالادیغیم قونولارا قیسسا زامان دا اولورسا بیر پرده چکدی. آمما بو سورونلار چؤزولمه دن و تورکیه حاکمیتی بیر نورماتیو دئمکراتیک و حقوقی دئولته فورمالاشماقدا حقیقتن سیخینتی دادیر.

اومید ائتمک اولور کی اردوغان تورکیه نین سون ایللرینین گرگین دالقالاریندان سونرا، بعضی غیردئمکراتیک سیاست لر، دینچی آخیمی دئولت آپاراتیندان گؤجله ندیرمک و هابئله مطبوعات ساحه سینده مونوپولیا سیاستینه سون قویماقلا و کورد سورونونا دئمکراتیک نورملارا اویقون بیر چؤزوم بولورسا... تورکیه نی آیدن و ایشیق گونلره گؤتوره بیلمه سینه آینانماق اولور.

20160807

تورکیه نین مودئرن سسینه قولاق آساق

  یونس شاملی
 تورکیه نین بوگونکو دورومونو او اؤلکه نین بیر کولتور اینسانین دان ائشیده ک. دئمکراسی نه دئمک دیر، دمکراسی کالیته سی نه دیر و قادین ائشیت لییی نئجه گرچک لشیر دئیه، رومان یازیچی سی الیف خانیم شافاک لا، سی ان ان تورک تئلیویزیونون "هفته سونو" پروقیرامیندان قولاق آساق.

بو دانیشیغا قولاق آسمانی تورکیه توپلومون داها یاخشی تانیماغا چالیشانلارا توصیه ائدیرم

 
 
 
 
RSS 2.0