عمومیتله من اؤز یازیمدا، امما و اگرسیز، بولگه ده میللت لرین اؤز مقدراتینی تعیین ائتمه حاقینی ورقولاماق اوچون عراق کوردوستانیندا ایستیقلال رئفراندومونو اولوملو ده یرلندیرمیشم. آمما بیزیم  بعضی میللتچی لریمیز مسئله یه ائله بیر آچیدان باخیرلار کی او باخیش آچیسیندان ایستقلال رئفراندومونا قارشی دورماق سونوجلانیر. یعنی گونئی آزربایجان دا «تورک میللی حرکاتی» عراق کوردوستانی ایستیقلال رئفراندومونون قارشیسیندا دورماقلا ، ایران دئولتی نین سؤمورگه چی سیاستی ایله ائشیت موقع ده دورورلار. ایران دئولتی ایله ائشیت بیر موقع ده دورماق اؤزو گؤستریر کی ایستقلال رئفراندومونا قارشی چیماق بیزیم حرکاتیمیزین چیخارلاری ایله اوست اوسته دوشمور.

 

باشقا دئیشله، بیزیم میللی حرکاتا، گرچک چی اولورساق، عراق کوردوستانی نین ایستیقلال رئفراندومو حاقدا ایکی یول وار؛

 

بیری؛ کرکوک حاقدا تنقیدیمیز او درجه ده یوغون اولورسا کی بیزیم توتوموموزو کوردوستان ایستیقلالیت رئفراندومونا قارشی چیخسین و بیزی عراقین کوردستان حکومتی ایله بیر دوشمن موقعینه گتیریب چیخارتسین و بونون سونوجو گونئی آزربایجان دا «تورک میللی حرکاتی» عراق کوردوستانیدا ایستیقلال رئفراندوموندا ایران دئولتی ایله ائشیت بیر موقع ده دورسون!! بیر باشقا دئیشله، «تورک میللی حرکاتی» نین فعالاری ایران دئولتی ایله عراق کوردوستانیندا میللی حاقلار الده ائتمه یه چالیشان بیر یئرل دئولت له دوشمن کیمی داوراناق! یعنی بیز خالقیمیزین دوشمنی (ایران دئولتی) ایله باشقا بیر میللتین میللی حاقلارینا قارشی بیر جبهه ده اولاق! 

 

 بو یول یعنی ایران دئولتینه آلت اولماق دئمکدیر...

 

ایکینجی سی؛ عراق کوردوستانی نین کرکوک حاقدا ایلحاقچی سیاستی نی قینایاق، آمما ایستقلالیت رئفراندومون اولوملو ده یه رلندیرک. رئفراندوم حاقیندا بو توتوموموز اولورسا، بیرینجی سی، ایران دئولتی نین سیاستیه قارشی بیر موقع ده دوروروق، ایکینجی سی ایستیقلال رئفراندومون مثبت ده یرلندیریریک و بو واسیطه ایله بؤلگه ده میللی حاقلارین گؤنده مه گلمه سینه شرایط یارالدیریق و یا او شرایطین یارانماسینا یاردیمجی اولورروق. بیر طرفدن ده رئفراندومو مثبت آلقیلاماقلا کامو اویو بؤلگه ده و دونیادا میللی حاقلار تانیش اولموش اولور. سونون دا تورک میللی حرکاتی سیرالاریندا فعالیت ائدنلره هیجان وئریر و حرکاتی حیزلاندیریر.

 

من رئفراندوم حاقیندا بو ایکی فرقلی توخونوش شیوه سینده البته کی  ایکینجی شیوه نی گونئی آزربایجان دا و ایران دا «تورک میللی حرکاتی»نا اولوملو و دوزگون بیر موقع گؤرورم و  فارسجا یازیمدا اونا یؤنلمیشدیر. 

 

 مسئله نین باشقا یؤنلری ده واردیر. بو یؤنلردن عبارت اولان بیرسی بودور کی؛ عجبا عراق کوردوستانیندا ایستیقلالیت بو تئزلیک ده گرچک لشمک ایمکانی وارمی؟ من دوشونمورم کی ایستقلالیت عراق کوردوستانینا بو تئزلیکده سؤز قونوسو اولمویاجاقدیر. 

 

ایکینجی سورو بودور کی؛ عجبا عراق کوردوستانی ایستیقلالیت آلیرسا کرکوک یئنی یارانان دئولتین ترکیب ینده اولاجاقدیر می؟ من هئچ اینانمیرام کی عراق کوردستانی موستقیل اولورسا کرکوک او دئولتی ترکیبینده اولاجاقدیر. البته کی بارزانی حکومتینین ایلحاقچی سیاستی نه حقوق لا و نه ده بؤلگه ده موجود سیاسی گوج لرله گرچک لشه بیلمز. بو عصرده، کیچیک و گنج دئولت لرین ایلحاقچی سیاستی اولماسی یالنیز او دئولت لرین اؤزلرینه زیان وئره بیلر. 

۲۰۱۷/۹/۲۶