پیریمیتیویزیم میللی دئموکراتیک حرکاتینین باشینین بلاسی دیر
بابک بئی بخت آورین عجایب ایدعالارینا بیر باخیش
سعید بئی عزیزی ایله بابک بئی بخت آور، آراز نیوزین بیر پروقیرامیندا تورک دیلینده دارتیشمیش لار. آمما بابک بئی او پروقیرامدا تورکجه ده ایضاحاتینی یئترلی گؤرمه یب، اونلارین بیرده فارسجا یازمیشدیر.
بابک بخت آور پروقیرامین ایلک 10 دقیقه سیندن سونرا سؤزلری موباحیثه قونوسو حاقدا سونا چاتیر و بعضی آرقومان لارا دایاناراق (اونلاری اؤزونوز اوخویون) بو سونوجا واریر کی تورک آزربایجان تشکیلاتی نین دایانیشمایا (همبستگی یه) قاتیلماسی کوردلره مشروعیت وئریر!! یعنی بابک بئی دئیر کی کوردلر فعالیت ائدن یئرلردن قاچمالییق!! باشقا دئیش له کوردلر بابک ین بو فیکیرلرین بیلسه لر سه سیاسی فعالیت لرین هامیسیندا وار اولورلار و بیز تورک لر اوردان قاچماق مجبوریتنده قالیریق!! بو دوشونجه طرزی سیاست ساحه سینده گولونج بیر گیریشیم دیر کی کوردلر اولوب اولمامالاری بیزیم اولوب اولمامیزی تعیین ائدیر!!
بابک بخت آورین اؤزئیسل (سطحی) آرقومئنت لرین دن وآز کئچسک بئله، بو بئی تورک لرین مرکزه یؤنه لیک سیاست آپارماقدان اوزاقلاشدیرماغا چاغیریر!! یازیسینا باخیرسینیز بخت آور کیمسه ایله مرکزده یاخینلاشا بیلمه ریک دئیر، چون کو بابک بئی دئیر کی مرکز ده فارس قوروپلارینین هامیسی ایران رئژیمیندن فرق لری یوخدور!! بخت آور دئیر کی ایران رژیمینه قارشی ائتلاف لارا، بیرلیک لره، چابالارا قاتیلمامالییق، چون کو اونلارین ایران رئژیمی ایله فرقی یوخدور! (مواضع ضد تورکی و تورکیه ای احزاب چپ ایرانی تفاوتی با دیگر احزاب ملی گرا یا سلطنت طلب و جمهوری اسلامی ایرانی نداشته و..) هم ده کی او فعالیت لرده کوردلرده وادیرلار!! بابک بخت آورجه کوردلر اولان یئرلرده بیز اولمامالییق !! الله بو آداما یاردیمجی اولسون.
بابک ین یوخاریداکی یازیدا اؤنه سوردویو فیکیر، سیاست قورالاری ایله گولونج سویه ده بیر فیکیر دیر. بابکین فیکرینه قارشی اولاران اؤرنک لر گتیرمک اولور. فنلاند ایستیقلال ساواشیندا استالین قارشیسیندا هیتلردن یاردیم آلدی و ایستیقلالیتین قازاندی. ایندی هیتلر هاردا و فنلاند هاردا. یاسر عرفات فلسطینین قورتولوشو اوچون هر دایم عرب لرین مرتجع دئولت لری ایله آلیش وئریش ده اولدو و سونوندا فلسطینی حقوقی یؤندن بیر سویه یه قالدیردی. بو حقوق دونیانین ان گوجلو بلوکونون قارشیسندا، یعنی آمئریکا و ایسرائیل بیرلییی قارشیسیندا گرچک لشدی. نئلسون ماندلا دئولت ایرقیچیلاری ایله موذاکیره و موعامیله ائتدی و بوگون گونئی آفریقادا ایرقیچیلیغا کؤکوندن سون وئریلمیشدیر.
آشیری جیلیق، حیسسی و عصبی داورانان شخص لر، بابک بخت آور کیمی لر، راسیونال اولابیلمزلر و ائله بونا گؤره ده سیاست ده اینجه لیک لری گؤره بیلمزلر. بخت آورین اؤفکه سی اونو حتتا گرچک لری گؤرمک دن بئله اوزاق ساخلاییر. کوردلر حاقیندا ائله دانیشیر کی گویا کوردلر ایرانین مرکزده کی سیاستین ده چوخ اؤنملی رول اوینویاجاقلار. حال بو کی کوردلر ایرانین 6دان 8 فاییز جمعیتین تشکیل ائدیر و معین بیر بؤلگه ده یاشاییرلار. کوردلر ایرانین تاریخینده مرکز سیاسیتینه ائتگی بوراخمایبلار. آمما بابک بخت آورین گؤروشلرینه باخاندا کوردلری قرار وئریجی بیر موقع ده گؤستریر! قرار وئرن اولماسادا مرکزچی لر اونلارلا برابر حرکت ائدیرلر دئیر!! کوردلرین سیاسی گوج لری بوگون اونلارین سیاسی آلاندا اولمالاری اوچون دور. باخین گؤرون نئچه کورد کئچن 40 ایلده اؤلدورولموشدور؟ یالنیز 300 دن فاضلا بیر پارتیانین عضولریندن خاریجده تئرور اولموشدورلار. بیزیم پارتیالاریمیزین هله 300 عضو یوخدو! آمما بابک بئی ایستیرلر کی ائولرینده اوتورسونلار و تورک میللی حرکاتی سیاسی آلاندا جیددی آلینسین!! حرکاتیمیزین گوجله نمه سینه امک وئرمک لازیمدیر.
بابک بخت آور بو موباحیثه نین قونوسوندان چیخیر و منه قارشی، آدیمی وئرمه دن، عجایب یالان ایددعالاردا بولونور. پروقیرام عرفه سینده منیم دیلیم دن بیر نئچه قابا "یالانی" اؤنه سورو. او یالانلاردان بیریسی ، گویا من کوردلری آزادلیق گؤورچین لری کیمی تقدیم ائتمیشم!!
بابک بخت آورین بو دانیشیق دا یالانلاری دوام ائدیر و گینه منه قارشی دئیر کی من گویا عراق دا و سوریه ده کوردلرین اشغالچی سیاستینه مشروعیت وئرمیشم!! آتالاریمیز دئمیشکن اوتانماسان اویناماغا نه وار!! (اویناماق سؤزون بو آتا سؤزون ده دانس ائتمک یوخ، اویون باز اولماق حئساب ائدین).
بابک بخت آور بیرلیک تشکیلاتی نین دایانیشمایا (همبستگی یه) قاتیلماسینا قارشی دورور و ائله گؤستریر کی گویا بیزیم "دایانیشما"دا اولماغیمیز چوخوردان چیخان میللتیمزی قویویا سالاجاقدیر!! بابک بئیه دئمک لازیمدیر کی لوطفن بیر تشکیلاتی فعالیت قئیرتی ایچینده اولون، اوندان سونرا بیزدن ایسته یین کی بوردا و یا اوردا اولاق یا اولمویاق! یوخسا سیزه قالیرسا هر سیاسی آلاندا تورک لر اوزاق قالاجاقدیر!
کئچن 30 ایلده آشیری میللت چیلییین (ناسیونالیزیمین) تخریباتچی رولو حرکاتیمیزین ایره لیله مه سینه جیددی انگل اولموشدور. بو آشیری ناسیونالیست لرین دیل و داورانیش لاری اوچون خاریجده گوندن گونه هر کس ائوینه چکیلمیشدیر، هر کس توپلوملاریمیزدان اوزاقلاشمیشدیر، هر کس خیال قیریقلیغینا اوغرامیشدیر. بابک بخت آور بو آشیری ناسیونالیزمین اؤنملی بیر نمونه سی دیر. آجی و اهانت ائدیجی دیل باخیمیندان بابک بخت آور ایلک سیرالاردا گلن لردن سایلا بیلیر...
تورک آزربایجان میللی دئموکراتیک حرکاتی فیکیر آچیسیندان دئموکراتیک بیر دوشونجه یه دایانماسا، دیل و ادبیات باخیمیندان دونیا سویه سینده ایستفاده اولان دیل و مدنیت کولتورنه یاخینلاشماییرسا، اؤزونو موعاصر، باریش سئور، اینسان حاقلارینا اینانان، فمئنیست و عدالت پرور اولماینجا حرکاتیمیز چوخ جیددی ساخینجلالارلا قارشی قارشی یا دوراجاقدیر.
پیریمیتیویزیم دن و گئریجی دوشونجه لردن اوزاقلاشماینجا و مودرن بیر آکتیویست اولماینجا ایره لیله مه ده مومکون اولمویاجاقدیر. بو سؤزو بابک بخت آور و اونون کیمی دوشوننلر قولاقلارین سیرقا ائتمه لی دیرلر.
2019-04-06
منیم طرفیمدن یایلان دانیشیقلار یازیلار و ایمضا آتدیغیم بیانات لار؛
ایران دا آزربایجان و کوردوستان علاقه لری حاقدا
https://www.youtube.com/watch?v=2UrGkVwvnH4&t=2s
تورکیه ده کورد مسئله سینه چؤزوم
https://www.youtube.com/watch?v=2CvRPfKKGQk&t=40s
آزربایجان دئموکراتیک بیرلیینین کورد مسئله سی حاقدا بیاناتی
https://www.facebook.com/notes/%D8%A8%DB%8C%D8%B1%D9%84%DB%8C%DA%A9-birlik/%D8%A7%D8%AF%D8%B9%D8%A7%D9%87%D8%A7%DB%8C-%D8%A7%D8%B1%D8%B6%DB%8C-%D8%B6%D8%B1%D9%88%D8%B1%D8%AA-%D8%AD%DB%8C%D8%A7%D8%AA%DB%8C-%D8%A7%D8%AA%D8%AD%D8%A7%D8%AF-%D9%85%D9%84%D9%84-%D8%AA%D8%AD%D8%AA-%D8%B3%D8%AA%D9%85-%D8%B1%D8%A7-%D9%85%D8%AE%D8%AF%D9%88%D8%B4-%D9%85%DB%8C-%DA%A9%D9%86%D8%AF/2251973961710944/
بیانیه کنگره ملیتهای ایران فدرال درباره حدود و ثغور ارضی در ایران
http://www.iran-federal.org/%D9%82%D8%B7%D8%B9%D9%86%D8
