خالقیمیزین آجیسی؛ میللی شعورسوزلوقدان قایناقلانیر، یوخسا جسارت سیزلیک دن می؟
اومید ائدیرم کی آشاغیدا گلن فیکیرلریم، عباس بئی لیسانی یه سایقیسیزلیق سایلماسین. سایقیمیز عباس بئی یه و موباریزه یولداشلارینا یئرینده دیر. حتتا حرکاتیمیز اوچون چکدیی چتین لیک لر اوچون، او کیشییه مینتدارلیغیمیزی بیلدیرمک ایسته رم. آمما فیکیر آلیش وئریشی، فیکیر فرقی لیلیک لرینی گؤسترمک، هم لازیم و هم ده قاچینیلمازدیر. تورک میللی حرکاتی نظری ساحه ده بو فیکیر فرقلی لیک لرینین قارشیلیغیندان بسله نمک ده دیر.
نمونه اولاراق؛
مشروطه حرکاتیندا، دمکراتیک ایستک لر اوچون تبریز الی یالین مرکزی اوردوسو و استبداد یانلی لاری قارشیسیندا آج- آجینا و سوسوزجاسینا موجادیله ائتمه میشدیر می؟
آزربایجان میللی حوکومتی دئورینده، باشلانقیجدان سونونا قدر تورک خالقی تامام چتینلیک لره رغمن موجادیله سینی سوردورمه میشدیر می؟
حتی شاه رژیمینه قارشی بیرینجی مئیداندا اولان خالق و اونا قارشی رادیکال بیر موباریزه آپاران میللت، تورک میللتی اولمامیشدیر می؟ شاه رژیمینین زیندان لاریندان آن آغیر باسقی و اوزون سوره زیندان لارا معروض قالمامیشدیر می؟
ایران ایسلام جمهوریتی ایرتجاسی ایله موباریزه ده، خردادین میللی قیامیندا، اورمو گولونون اوزونتولو حالینه اعتراضلاردا تورک خالقی جسارتسیز داورانمیش می؟
حتی قادین لاریمیزین موجادیله سی و ایش و امک ساحه سینده موباریزه ائدن لر بئله هر زامان جسارت و باشاری قایناغی اولموشدورلار.
سایدیق لاریما گؤره عباس بئی لیسانی نین جسارت آنلایشین یالنیش بولورساق، یانیلمامیشیق. حتتا اوندان یالنیش اولان بیلیم صاحیب لرین، و تورک بوروکرات لاری و تکنوکراتلاری (دوکتور، موهندیس و ساودلیلاری اؤز دانیشیغیندا قیناماسی دا یالنیش بیر آنلایشین سرگیله ییر و اپین دوزگون اوجو ایتیب باتیر. ”اؤلوم اولسون ساوادا” قاورامی کؤکوندن آغیزا گتیریلر بیر سؤز دئیل و موعاصیر بیر اینسانین آغزیندان چیخمامالی دیر. آمما عباس بئی تاسوفله یالنیش آنلایشا گؤره ساواد و بیلیمه قارشی اؤفکه لی دانیشیر!
بیزیم میللتیمیزین اسارتینین آیدن- آشکار نه ده نلری (سبب لری) واردیر. او نه دن لرین بیر طرفی خاریجی تضاد و باشقا طرفی داخلی تضاد دان عبارت دیر. خالقیمیزین اسارتی نین خاریجی نه ده نی (سببی) ایچ سؤمورگه چی (داخلی استعمار) بیر دئولتین سینیرلارندا یاشاماق دیر. یوز ایلدن بری خالقیمیز بیر سیاسی/دینی استبداد و ایچ سؤمورگه چیلیینه ایران دا معروض قارمیشدیر. بیر باشقا طرفدن خالقیمیزین اسارتینین ایچ نه ده نی (سببی) خالقیمیزین گنلده ”میللی شعورسوزلوغوندان” قایناقلانیر.
ایران دئولتی نین ایچ سؤمورگه چیللیک سیاستی، و خالقمیزین میللی شوعورا قووشماسیندان اولان ساخینجالار، تورک خالقینی گتیریب اسارت لی بیر دوروما چاتدیرمیشدیر. آمما خالقیمیزین بو اسارتدن نه فورمادا قورتولابیلیر؟ بو اسارت دن قورتولماماسی او خالقین جسارتسیزلییندن قایناقلانیر، یوخسا بو پروبلئمین کؤک لری خالقیمیزین ”میللی شوعورسوزلوغوندان” قایناقلانیر؟ دیققت ائدیرسک بورادا اسکیک لی جسارت و یا قورخمامازلیق یوخ، بلکه بیلینج سیزلیک، میللی شعور اینسانلاریمیزین فیکیرینده بیر یئرینین اولماماسیندان قایناقلانیر. بونا گؤره میللی آزالیق یولو، بیزیم خالقیمیزا جسارت وئرمک دن یوخ، بلکه اونا میللی بیلینج و یا میللی شوعور وئرمک دن گئچیر. ائله بونا گؤره ده تورک میللی حرکاتی نین یولو بو باخیش آچیسی ایله تامامیله آیدین دیر.
میللی آزادلیق اوغوروندا حرکت ائتمک اوچون، اول خاریجی سببی یعنی ایران دئولتی نین بیراساس انگل کیمی حرکاتین قارشیسیندان قالدیرماق لازیمدیر. آمما بو انگلی قالدیرماسینا ایلک اؤنجه اسارتین ایچ نه ده نینه (سبب بینه) یعنی ”میللی شعورسوزلوغا” اوداقلانماق گرکیر.
ایندی میللی شعور خالقمیزین بیر جیددی کسیمینده کؤک سالمیشدیر، آمما بو میللی شوعور بیر دوزگون سوسیال سیاسی نظریه یه دایانمادیغی اوچون حرکاتیمیز فیکیر و تئوری ساحه سینده چوخ اوزئی سل بیر درومدادیر. عباس بئی لیسانین نین بوزقوردا سؤیکن مه سی و خالقیمیزی حماست یارالتماق و قهرمان لیق گؤسته رمه سی گؤزلنتی سی آدین چکدییم آخساقلیغین بیر جیددی گؤستری سی دیر.
بو آشامادا، تورک آکتیویست لری حرکاتی تئوریک جهت دن باریندیرمالی و حرکاتی مدنی و سیاسی بیر موجادیله عرفه سینده درین لشدیرمه سی و گئنیش دیرمه سی دیر. بو آشامالاری دوزگون بیر سیاسی استراتژی اولمادان آشماق اولماز.
رئآل بیر ایستراتئژی، دئموکراتیک دیل و سوسیال سیاسی تئوری چوخ گئنیش واسیطه ده خالقیمیزین کامو اویوندا (افکار عمومی سینده) یایلمالیدیر. و بو واسیطه ایله سیاسی تشکیلات لار فورمالاشمالی و خالقیمیزین اؤز سیرالاریندا اورقانیزه اولماسی لازیمدیر.
بو یول بیر اوزون یولدور. بو یولدا دوزوملو، ده رین و جیددی اولماق لازیم دیر. منجه، خالقیمیزین اسارت ده اولماسین، اونون بونون باشینا سالماق یئرینه، دریندن بیر دئموکراتیک ایستراتئژی چرچواسیندا چالیشماق گرکیر.
عباس بئی و باشقا دوستلار و سیلاح داشلاریما دئیم کی؛
خالقیمیزین میللی موجادیله سی اؤز- اؤزونه بسلن مئیه جکدیر، هئچ بیر حرکت تاریخده اؤز- اؤزونه ایره لی گئتمه میشدیر. بو ایش چوخلو زحمت لره و گئنیش واسیطه ده چالیش مالارا احتیاجی واردیر. بو طورلو بیر فعالیت و چالیشقانلیق اولورسا یقین کی خالقیمیزده هدف لرینه واراجاقدر.
عباس بئی لیسانی یه بیر تنقید ده لازیم دیر. ”تورک میللتی نین میللی حرکاتی نی” ”آزربایجان میللی حرکتی” آدلاندیریر و بو آدلاندیرماق، اؤزو خالقیمیزین اه لینه (آسیمیله) اولماسینا نه دن اولور. بیزیم خالقیمیزین میللی کیملیکی نین آدی، آزربایجان یوخ، تورک دور. بیزیم خالقین میللی وطنی نین آدی آزربایجان دیر. خالقیمیزین آدین یالنیش آنلادیرساق، هم خالقیمیز میللی شوعور تاپماسیندا چتینلیک چه که جکدیر، هم ده میللی موقدراتین الده اولونماسیندا جیددی ساخینجالار مئیدانا چیخا بیلیر.
گؤردویونوز کیمی بیزیم خالقین جسارتینده بیر اسکیک لیک یوخدور، آخسایان یؤن ”میللی شوعورون” لازیمی قدر میللتیمیزین عمومی افکاریندا یایلماماسی دیر.
20200309
https://www.facebook.com/100010270126274/videos/636494310036234/UzpfSTcwNTQ3NjU4ODoxMDE1NzA4NDg0NTQyMTU4OQ/
