ایکی چئلیشگیلی ایستراتئژی پروفیلی
ایکی چئلیشگیلی ایستراتئژی پروفیلی
Yazını səsli dinləyin//یازینی سسلی دینله یین
Tıklayin
سون هفته لرده، آزربایجان و کوردستان موناسیبتلرینه بیر دوزن وئرمک اوچون، مئدیادا ایکی یازی یایدیم1. آدین چکدییم ایکی یازی هم کورد، هم ده تورک/آزربایجان تشکیلات لارینین ایلگیسین چکدی و هر ایکی طرفدن ده دیرلندیرمه لره و موباحیثه لره و حتی بعضی گلیشمه لره یول آچدی.
آدین چکدییم یازیلاریمین دیققت چکن یؤنو کورد تشکیلات لاریندا الحاق ائدیجی فیکیرلره و “ اورمیه ایالتی” (استان اورمیه) قاورامین ایشله تمه سینه و اونو کوردستان ایالت لریندن بیریسی کیمی گؤسترمه چاباسینی تنقید آلتینا آلمیشدیم. بو یازیلار واسیطه سی ایله کورد تشکیلات لارینین بو ساحه ده اؤز سیاست لرینه چکی- دوزن وئرمه سینی طلب ائتمیشدیم. رئآکسیالار و تپگی لر هر گون گئنیشمه ده و بو پروسئس هله ده تورک/آزربایجان و کورد مئدیا و تشکیلات لاریندا دوام ائتمک ده دیر.
آمما آدین چکدییم یازیلار تورک/آزربایجان طرفینده چلیشگیلی موباحیثه لره یول آچمیش و حتی سون گونلرده گرگینلییه بئله فورصت یارالتمیشدیر. بو چلیشگیلی موباحیثه لر و حتی گرگینلییه یول آچان رئاکسیالار گئچن 10 ایلین عرفه سینده بعضی تورک/آزربایجان تشکیلات لارینین مئیداندا اولان پروبلئم لری چؤزمه چاباسی یئرینه، موباحیثه لری بیر ساواش آلانینا چئویرمیش و تورک میللی دئموکراتیک حرکاتیندا قوشقولو سیاست لره زمین یارالتمیش دیر. باشقا دئیش له تورک/آزربایجان تشکیلات لاری تورک- کورد علاقه لرینه دوزن وئرمه ده و ایران ایسلام جمهوریتی ایله بیرگه موباریزه نین فورمالاشماسینا یاردیمجی اولماق یئرینه، ایکی فرقلی باخیش، ایکی فرقلی و حتتا چارپیجی ایستراتئژی و عمومیت له حرکاتیمیزدا ایکی فرقلی سیاسی پروفیل فورمالاشدیرمیشدیر.
ائله بونا گؤره دن من بو قیسسا یازی دا او ایکی سیاسی استراتئژینی و سیاسی پروفیلی گؤسترمه یه چالیشاجاغام.
بیلدینیز کیمی، بوگون تورک خالقی نین، گونئی آزربایجان و عمومیت ده ایران دا، گلیشمه سینه و سعادتینه انگل تؤردن و بیزیم خالقیمیزی اسارت ده ساخلایان و وطنیمیزی (گونئی آزربایجان دا، قشقائیستان دا، خراسان، اصفهان و تهران دا) ایشقال ائدن قوه ایران ایسلام جمهوریتی دیر. بو رئژیم بوگون بیزیم خالقین (و البته ایران دا یاشایان باشقا خالق لاریندا) گلیشمه سینین اساس مانعی و اصلی دوشمنی دیر. باشقا دئیش له ایران رئژیمی بیزیم خالقین اصلی دوشمنی یا اصلی تضادی و باشاقا قوه لر حرکاتیمیزین فرعی تضادلاری (اؤرنه یین، سلطنت طرفدارلاری، پان ایرانیست تشکیلاتی، سازمان مجاهد خلق، جبهه ملی و یا الحاقچی کورد قوروپلاری و...) حئساب اولورلار.
دوزگون، اویقون و عین حالدا میللی حرکاتیمیز اوچون دئموکراتیک بیر ایستراتئژی ده اصلی تضادا و یا اصلی دوشمانا اوداقلانماق (تمرکز) شرط دیر و فرعی تضاد لارایله، اصلی دوشمانا فورصت وئرمه دن قارشیلاشماق لازیمدیر. باشقا دئیش له حرکاتیمیزین فرعی تضادلارینا قارشی ائله بیر سیاست گؤتورمه لییک کی اصلی تضادین یا اساسا دوشمانین ضعیفله مه سینه سبب اولسون. آمما فرعی تضادلارلا قارشلاشما سیاست لریمیز اصلی دوشمانی گؤجلندیریرسه، و یا اصلی دوشمانی گؤزدن قاچیریرسا و یا فرعی تضادلاری اصلی دوشمانین یئرینه قویورساق، عملده اصلی دوشمانا، یعنی ایران ایسلام جمهوریتینه، یعنی تورک خالقینی اسارت ده ساخلایان قوه یه یاردیمجی اولموشوق.
اؤرنک وئرمک ایسترسم، یوخاریدا آدین چکدییم فرعی تضادلاری، هئچ فرق ائتمز، سلطنت چی لری، یا حتتا پان ایرانیست پارتیانی و یا خلق مجاهدلر قوروپونو و یا بعضی کورد یایمجی قوروپلاری اوقدر دوشمن توتاق کی ایران رژیمی اصلی دوشمان سیراسیندان چیخسین و یا حتی بعضی آکتیوست لره گؤره ایران ایسلام جمهوریتینی دوست سیراسیندا یئرلشدیرمه یه قدر ساپما (منحرف) فیکیر اورتایا چیخسین و بو واسیطه ایله اصلی دوشمانلا فرعی تضادلارین یئری قاریشسین و دئیشسین و عملده بوگون ایران داکی ایقتیدارا حیاتینی دوام ائتمک اوچون فورصت یارانسین.
سون هفته نین موباحیثه و ده یرلندیرمه لریندن، تورک میللی دئموکراتیک حرکاتینین سیرالاریندا، ایکی سیاسی ایستراتئژی و ایکی سیاسی پروفیل مئیدانا چیخدی؛
بیرینجی سیاسی پروفیل:
یوخاریدا ایضاح ائتدییم کیمی، خالقیمیزین و تورک میللی حرکاتینین اصلی دوشمانین (اصلی تضادین) ایران ایسلام جمهوریتی تانییر و حرکاتیمیزین فرعی تضاد لارایله یالنیز اصلی دوشمانی ضعیف له تمه شرطی ایله موباریزه آپاریر. اؤرنک اولاراق موخالیفت سیراسیندا پان ایرانیست لر و فاشیست مرکزچی لرله قارشی یالنیز خالقیمیزی موعاریفلشدیرمه سیاستینی گئنیشدیرمه لی و یا کوردلرین سیراسیندا الحاقچی دوشونجه لری تنقید ائدیب بو فیکیر لرین اصل دوشمانا خیدمت ائتدیینی ایفشا ائتمه لییک. باشقا دئیش له بیرینجی سیاسی پروفیل، خالقیمیزا و تورک میللی دئموکراتیک حرکاتا ایران ایسلام جمهوریتینی تکجه اصلی تضاد و اساس دوشمن حئساب ائتمک و فرعی تضاد لارلا اصلی دوشمانین ضعیفلتمه سی شرط ایله قارشیلاشماق پروفیلی دیر.
ایکینجی سیاسی پروفیل:
تام ترسینه حئساب کیتابسیز فورمادا فرعی تضاد لاری اصلی تضادین و یا اصلی دوشمانین یئرینه قویماق و اونا اساسلاناراق سیاست آپارماقدیر. تورک - کورد علاقه لرینه گلدیکده، حرکاتیمیزین سیرالاریندا اولان سیاسی تشکیلات لارین و حتی بیر سیرا منفرد آکتیویست لرین عجایب درجه ده آشیریجی و دوشمن سئویندیرن سیاست لری گؤزه چارپیر. بو سیاست لر گئچن هفته نین عرفه سینده و مئدیادا داها چارپیجی و چیلپاق فورمادا مئیدانا چیخدی و تلویزیون پروقیراملارینین بیرینده تایماز بئی اولمولو آدیندا گویا بیر آکتیویست چوخ ایلگینج بیر جمله قوردو و بو جمله ایله ایکینجی سیاسی پروفیلی تورک حرکاتی سیرلایندا آغزا گتیریب بئله فورمالاشدیردی:”اساسن بیز گؤرورک کی حتتا او اشقالگر فارس حاکمیتی بیزیم جانیمیزی، مالیمیزی، ناموسوموزی، ائویمیزی و ائشییمیزی محافظت ائدیر، امنیت یمیزی حفظ ائدیر. اگر اولماسایدی او امنیت یوخ ایدی.” (سیتادین سونو)
تایماز اورمولو، و البته گویا بیر سیرا آکتیویست لر و حتتا بعضی سیاسی تشکیلات لاردا، اصل دوشمنی ایران رئژیمی دئیل، بلکه کورد پارتیالاری اصلی تضاد و اساس دوشمن حئساب ائدیر. بو دوشنجه طرزی یعنی کورد پارتیالارین اصلی دوشمن سانماق، تورک میللی حرکاتیندا ان آشیریجی، ان جایدریرجی و عین حالدا ارتجاعچی و دوشمانا خیدمت ائدن بیر دوشونجه طرزی دیر. چون کو بو دوشونجه هم تورک حرکاتینین گوجونو و هم ده کورد حرکاتینین گوجون بیر- بیر ایله ساواشمادا ضعیف لشدیریر و ایران رئژیمینی بو ایکی میللتین سیاسی گوجون سیخینتی سیندان قورتاریر و حاکیم ارتجایا ان اویقون خیدمتی ائدیر.
بو ساحه ده باشقا اؤرنک لر چوخدور. آمما بیر ایکی اؤرنک له ایکینجی و حقیقتان ساپما (انحرافی) سیاسی پروفیلین باشقا فورمالاریندا گؤسترمک اولور. نمونه اولاراق گون آز تی وی ده، و البت ده کی تازالیغی اولمویان احمد بئی اوبالی و اونون دوشونجه لریدیر. احمد اوبالی آدین چکدییم اصلی و فرعی تضاد لار تئوریسینده، کورد پارتیالاری ایله و ایران ایسلام جمهوریتین بیزیم خالقیمیزین دوشمانلاری کیمی تانیتدیرید. او بو فیکیرله حرکاتیمیزا بیر یئنی جبهه آچیر و بو واسیطه ایله تورک میللی حرکاتینی ایکی جبهه ده (کوردلر و ایران رئژیمی) ساواشماسین وورغولاییر. احمد اوبالی نین بو آنلایشینا دیققت ائدیرسک، تایماز اولمولو ایله بیرآزدا فرقلنسه ده، آمما عملده تورک میللی حرکاتین گوجونو، گرچک آنلامدا، حرکاتیمیزین قیسیتلی گوجونو، یالنیز ایران رئژیمی ایله دئیل، بلکه کورد قوروپلاری ایله ده ساواشمایا آپاریر ایسته ییر و بو واسیطه ایله ایران رژیمی قارشیسیندا تورک گوجونو یاریسینی و حتی کوردلرله ساواش اولورسا تورک حرکاتی گوجونون هامیسینی اورادا ساواشدیرماق سفربر ائدیر. بو او دئمک دیر کی احمد بئی اوبالی نین بو ساپما سیاسی فیکیری ایران ایسلام جمهوریتینی بیزیم تورک و کورد خالقی لارینین موجادیله قورخوسوندان راحات لادیر. بورادا یالنیز گون احمد اوبالی نین گون آذ تی وی سی، و یا تایماز اورمولو دئیل، بلکه دیرنیش تشکیلاتی و اونا باغلی آراز نیوز سیته سی، و آشاغی یوخاری ماحمود بئی بیلگینه آیید پارتیادا بو سیرادا سایلا بیلیر.
سونوج بو کی، تورک/آزربایجان تشکیلات لاری و بیر سیرا آکتیویست لر طرفیندن میللی دئموکراتیک حرکاتینا ایکی پروفیل چیزمک چاباسیندا دیرلار. بیرینجی سی، کی بو قلم ده او پروفیله اینانانلادان سایلیر، خالقیمیزین و حرکاتیمیزین اساس دوشمنی ایرانین ایسلام جمهوریتی و اونون توتالیتر و فاشیستجه سیاست لریدیر. ایکینجی سیاسی پروفیل ایسه یوخاریدا وئردییم اؤرنک له ره دایاناراق تورک میللی حرکاتینی کورد تشکیلات لاری ایله، اصلی دوشمن کیمی، ساواشماقدا پروفیله ائتمه چاباسیندادیر.
ایکینجی پروفیل یوخاریدا ایضاح ائتدییم کیمی ایران رژیمینین آرزو ائتدیی و حقیقتا ساپما (انحرافی) بیر پروفیل دیر و بونو خالقیمیزین آیدین لاری، دوشونورلری و آکتیویست لری بیلمه لی و ایفشاء ائتمه لیدیرلر. تاسوفلر اولسون کی بوگون تورک/آزربایجان تلویزیالارنین بیر چوخو آدین چکدییم آشیریجی لار واسیطه سی ایله ایداره اولور. گرچکچی و راسیونال تورک تشکیلات لاری و تورک آکتیویست لر بو گئدیشاتی دوزگون و دئموکراتیک یولا رهبرلیک ائئمه ه چوخ جیددی مسئولیت داشیماقدادیرلار.
20200611
1-یازیلار / Yazılar
سیاست های ماجراجویانه حزب دمکرات کردستان ایران راه به کجا میبرد؟
https://www.birlik.se/%d8%b3%db%8c%d8%a7%d8%b3%d8%aa%d9%87%d8%a7%db%8c-%d9%85%d8%a7%d8%ac%d8%b1%d8%a7%d8%ac%d9%88%db%8c%d8%a7%d9%86%d9%87-%d8%ad%d8%b2%d8%a8-%d8%af%d9%85%da%a9%d8%b1%d8%a7%d8%aa-%da%a9%d8%b1%d8%af%d8%b3/
دو ترفند حزب دمکرات کردستان ایران در فرار به جلو
https://www.birlik.se/%d8%af%d9%88-%d8%aa%d8%b1%d9%81%d9%86%d8%af-%d8%ac%d8%af%db%8c%d8%af-%d8%ad%d8%b2%d8%a8-%d8%af%d9%85%da%a9%d8%b1%d8%a7%d8%aa-%da%a9%d8%b1%d8%af%d8%b3%d8%aa%d8%a7%d9%86-%d8%a7%db%8c%d8%b1%d8%a7%d9%86/
Türk milli- demokratik hərəkatında
İki çəlişgili istrateji profili
Yunus Şamili
Son hətftələrdə, Azərbaycan və kürdüstan münasibətlərinə bir düzən vermək üçün, mediyada iki yazd yaydım 1. Adın çəkdiyim iki yazı həm kürd, həmdə türk- Azərbaycan təşkilatlarının ilgisin çəkdi və hər tərəfdəndə dəyərləndirmələrə, mübahisələrə və hətta bəzi gəlişmələrə yol açdı.
Adın çəkdiyim yazılarımın diqqət çəkən yönü kürd təşkilatlarında ilhaqçı fikirlərə və Urmiyə iyaləti (ustane urimiye) qavramın işlətməsinə və onu kürdustan iyalələrindən birisi kimi göstərmə çabasını tənqid altına almışdım. Bu yazılar vasitəsi ilə kürd təşkilatlarının bu sahədə öz siyasətlərinə çəki- düzən verməsini tələb etmişdim. Reaksiyalar və təpgilər hər gün genişmədə və bu proses hələdə türk- azərbaycan və kürk mediya və təşkilatlarında dəvam etməkdədir.
Amma adın çəkdiyim yazılar türk- azərbaycan tərəfində çelişgili mübahisələrə yol açmış və hətta son günlərdə gərginliyə belə fürsət yaraltmışdır. Bu çəlişgili mübahisələr və hətta gərginliyə yol açan reaksiyalar geçən 10 ilin ərəfəsində bəəzi türk- azərbaycan təşkilatlarının meydanda olan problemləri çözmə çabası yerinə, mübahisələrə bir savaş alanına çevirmiş və türk milli demokratik hərəkatında quşqulu siyasətlərə zəmin yaraltmışdır. Başqa deyışlə türk- azərbaycan təşkilarları türk- kürd əlaqələrinə düzən vermədə ve İran islam cumhuriyəti ilə birgə mubarizənin formalaşmasına yardımçı olmaq yerinə, iki fərqli baxış, iki fərqli və hətta çarpıcı istirateji və ümumiyətlə hərəkatımızda iki fərqili siyasi profili formalaşdırmışdır.
Elə buna görədə mən bu qıssa yazıda o iki siyasi profili, və siyasi istratejini göstərməyə çalışacağam.
Bildiyiniz kimi, Bugün türk xalqının, Güney Azərbaycan və ümumiyətlə İranda, gəlişməsinə və səatətinə əngəl törədən və bizim xalqımızı əsarətdə saxlayan və vətənimizi (Güney Azərbaycanda, Qaşqayida, Xorasanda, isfahanda və Tehranda) işqal edən quvvə İran islam cumhuriyətidir. Bu rejim bugün bizim xalqın (və əlbətdə İranda yaşayan başqa xalqlarında) gəlişməsinin əsas manei və əsli düşmanıdır. Başqa deyişlə İran rejimi bizim xalqın əsli düşmanı ya əsli təzadı və başqa quvvələr hərəkatımızın fəri təzadları (örnəyin, səltənət tərəfdarları, paniranist təşkilatı, xalq mucahidləri, milli cəbhə və ya kürd ilhaqçı kəsim...) hesab olurlar.
Düzgun, uyqun və eyni halda milli hərəkatımız üçün demokratik bir istratejidə əsli təzada və ya əsli düşmana odaqlanmaq (təmərküz) şərtdir və fərii təzadlar ilə, əsli düşmana fürsət vermədən qarşılaşmaq laazimdir. Başqa deyişlə hərəkatımızın fərii təzadlarına qarşı elə bir siyasət götürməliyik ki əsli təzadın, ve ya əsas düşmanın zəəifləməsinə səbəb olsun. Yəni fəri təzadlarla qarşılaşma siyasətlərimiz əsli düşmanı gücləndirirsə, və ya əsli düşmanı gözdən qaçırırsa, və ya fərii təzadları əsli düşmanın yerinə qoyursaq, əməldə əsli düşmana, yəni İran islam cumhuriyətinə, yəni türk xalqını əsarətdə saxlayan quvvəyə yardımçı olmuş olarıq.
Örnək vermək istərsəm, yuxarıda adın çəkdiyim fərii təzadları, heç fərq etməz, səltənətçiləri, və ya hətta paniranist partiyanı ve ya xalq mücahidlər qurupu və ya bəəzi kürk yayımcı quruplari o qədər düşman tutaq ki, İran rejimi əsli düşman sırasından çıxsın ve ya hətta bəəzi aktivistlərə görə İran islam cumhuriyəti dost sırasına yerləşdirməyə qədər sapma (münhərif) fikir ortaya çıxsın və bu vasitə ilə əsli düşmanla fərii təzadların yeri qarışsın və əməldə bugün irandaki iqtidara həyatını dəvam etmək üçün fürsət yaransın.
Son haftənin mübahisə və dəyərləndirmələrinə, türk milli demokratik hərəkatın sıralarında, iki siyasi istrateji və iki siyasi profil meydana çıxdı;
Birinci siyasi profil;
Yuxarıda izah etdiyim kimi, xalqımızın və türk milli hərəkatının əsli düşmanın (əsli təzadın) İran islam cumhuriyəti tayıyır və hərəkatımızın fərii təzadları ilə yalnız əsli düşmanı zəyiflətmə şərti ilə mübarizə aparmalıyıq. Örnək olaraq muxalifət sırasında paniranistlər və faşist mərkəzçilərə qarşı yalnız xalqımızı müarifləşdırmə siyasətini genişdirməli və kürklərin sırasında ilhaqçı düşüncələri tənqid edib, bu fikirlərin əsli düşmana xidmət etdiyini ifşa etməliyik. Başqa deyişlə, birinci siyasi profil, xalqımıza və türk milli hərəkatına, İran islam cumhuriyəti, təkcə əsli təzad və əsas düşman sayılır və fəri təzadlarla əsli düşmanın zayiflətməsı şərti ilə qarşılaşmaq profilidir.
İkinci siyasi profil;
Tam tərsinə, hesab- kitabsız formada fəri təzadları əsli təzadın və ya əsli düşmanın yerinə qoymaq və ona əsaslanaraq siyasət aparmaqdır. Türk- kürd əlaqələrinə gəldikdə, hərəkatımızın sıralarında olan siyasi təşkilatların və hətta bir sıra münfərid aktivistlərin əcayib dərəcədə aşırıcı və düşman sevindirən siyasətlər gözə çarpır. Bu siyasətlər geçən həftənin ərəfəsində və mediyada daha çarpıcı və çılpaq formada meydana çıxdı və televiziya proqıramlarının birində, Taymaz Urmulu adlı güya bir aktivist çox ilginc bir cümlə qurdu və bu cümlə ilə ikinci siyasi profili türk hərəkatında belə formalaşdırdı; “Əsasən biz görürük ki hətta o işqalçı fars hakimiyəti bizim canımızı, malımızı, namusumuzu, evimizi və eşiyimizi mühafizət edir, əmniyətimizi hifz edir. Əgər olmasaydı o əmniyət yox idi” (sitadın sonu)
Taymaz Urmulu, və əlbətdə bir sıra güya aktivistlər və hətta bəəzi siyasi təşkilatlarda, xalqımızın əsli düşmani İran rejimi deyil, bəlkə kürd partiyaları xalqımızın əsi düşmanı deyə hesab edirlər . Bu düşünce tərzi, yani kürd partiyaların əsli düşman sanmaq, Türk hərəkatının ən aşırı, ən caydırıcı və eyni halda irticaçı və düşmana xidmət edən bir düşüncə tərzidir. Cünkü, bu düşüncə həm türk hərəkatının gücünü və həm kürd hərəkatının gücünü bir biri ilə savaşmada zəifləndirir və iran rejimini bu iki millətin siyasi gücünün sıxıntısından qurtarır və hakim irticaya ən uyqun xidməti edir.
Bu sahədə başqa örnəklər çoxdur. Amma Bir iki örnəklə ikinci və həqiqətən sapma (inhirafi) siyasi profilin başqa formalarında göstərmək olur. Nümunə olaraq, GünAz tvdə, və əlbətdə ki yeniliyi olmuyan Ahmed Obalı və onun düşüncələridir. Ahmad Obalı Adın çəkdiyim əsli və fəri təzadlar teorisində, kürd pratiyaları və İran islam cumhuriyətin bizim xalqın paralel düşmanı tanıtdırır. O bu fikiri ilə hərəkatımıda kürdlərə qarşı bir yeni cebhə açır və bu vasitə ilə Türk milli hərəkatını iki cəbhədə (iran rejimi və kürd teşkilatları ilə) savaşmanı vurqulayır. Ahmed Obalının bu anlayışına diqqət edirsək, Taymaz Urmulu ilə bir az fərqlənsədə, amma əməldə Türk milli hərəkatın gücünü, və gerçək anlamda, hərəkatımızın qısıtlı gücünü, yalnız İran rejimi ilə deyil, bəlkə kürd qurupları ilə savaşa aparmaq istəyir və bu vasite ilə İran rejimi qarşısında türk gücünün yarısını, və hətta əyər kürklərlə həqıqətən savaş olursa, türk hərəkatının gücünün hamısın orada savaşmaya səfərbər edir. Bu o deməkdir ki Ahmad Obalının bu sapma siyası fikri ilə İran rejimi Türk və kürk xalqının mucadiləsi qorxusundan rahatladır. Burada yalnız Ahməd Obalinin GünAz tvsi, ve ya Taymaz Urmulu deyil, Dirəniş təşkilatı, və ona bağla Araz news sitəsi, və aşağı yuxarı Mahmud bey Bilginə ayid partiyada bu sırada sayılabilir.
Sonuc bu ki, türk- Azərbaycan təşkilatları və bir sıra aktivistlər tərəfindən milli demokratik hərəkatına iki siyasi profil çizmək çabasındadırlar. Birincisi, ki bu qələmdə o siyasi profilə inananlardan sayılır, Xalqımızın və hərəkatımızın əsas düşmanı İran islam cumhuriyəti və onun totalitər və faşitcə siysətləridir. İkinci siyasi profil isə, yuxarıda verdiyim örnəklərə dayanaraq, Türk hərəkatını kürd təşkilatları ilə, əsli düşman kimi, savaşmaqda profilə etmə çabasıdır.
İkinci siyasi profil, Yuxarıda izah etdiyim kimi İran rejiminin arzu etdiyi və həqiqətən sapma bir siyasi profildir . Bu sapma siyasi profil xalqımızın aydınları, düşünürləri və rasiyonal aktivistləri bilməli və o siyasəti ifşa etməlidirlər. Təəsüflər olsun ki bugün Türk- Azerbaycan televiziyalarının bir çoxu andın çəkdiyim aşırıcıların vasitəsi ilə idare olur.
Gərçəkçi və rasiyonal türk təşkilatları və türk aktivistlər bu gedişatı düzgün ve demokratik yola rəhbərlik etmədə çox ciddi və önəmli məsuliyət daşımaqdadırlar.
20200611
یازیلار / 1-Yazılar
سیاست های ماجراجویانه حزب دمکرات کردستان ایران راه به کجا میبرد؟
https://www.birlik.se/%d8%b3%db%8c%d8%a7%d8%b3%d8%aa%d9%87%d8%a7%db%8c-%d9%85%d8%a7%d8%ac%d8%b1%d8%a7%d8%ac%d9%88%db%8c%d8%a7%d9%86%d9%87-%d8%ad%d8%b2%d8%a8-%d8%af%d9%85%da%a9%d8%b1%d8%a7%d8%aa-%da%a9%d8%b1%d8%af%d8%b3/
دو ترفند حزب دمکرات کردستان ایران در فرار به جلو
https://www.birlik.se/%d8%af%d9%88-%d8%aa%d8%b1%d9%81%d9%86%d8%af-%d8%ac%d8%af%db%8c%d8%af-%d8%ad%d8%b2%d8%a8-%d8%af%d9%85%da%a9%d8%b1%d8%a7%d8%aa-%da%a9%d8%b1%d8%af%d8%b3%d8%aa%d8%a7%d9%86-%d8%a7%db%8c%d8%b1%d8%a7%d9%86/
