یالنیش آنالیز یالنیش سونوج وئریر
دونن آمئریکا دئولتی حربی گوج لرین سوریه دن گئری چکمک ایسته دیینی ایفاده ائتدی. آمئریکا نین بو حرکت بؤلگه ده فرقلی رئآکسیالارا سبب اولدو. آمئریکانین یئنی موقعی گونئی آزربایجان دا دا رئآکسیالارا سبب اولموشدور. بو رئآکسیالاردا حئساب اولان گونئی آزربایجان اکتیویستی ماحمود بئی بیلگی نین فیس بوک دا یازدیغی قیسسا بیر نوتا دیر. من ده بو نوتو آنالیز ائتمه یه چالیشمیشام.
İndiyse Batı Azerbaycan’a daha diqqetlı yanaşmalıyıq.
Bayaz Saray’ın dediğine göre , neçe gün önce Erdoğan’ın Trumpla Telfon görüşmesi ardından ,Amrika Esgeri güçlerin Suriye’den çıxarma qararın verdi .
Başda Kürd teröristleri olmakla Avropa Birliyide bu qarardan çox üzüldü.Suriye geleceği üçün başarılı addım olsada, artıq bizler düşünmeliyik 10 minlerce silahli terörist hayana axacaq?
ماحمود بئین نوتونون سونو
یونس شاملی:
عزیز ماحمود بئی، سیزین بو رئآکسیالارینیز یاخین دان اوزاقدان نه گرچک لرله و نه ده گونئی آزربایجان دا تورک میللی حرکاتی ایله هئچ علاقه سی یوخدور.
بیر: یازیرسیز کی آمئریکانین سوریه ده چکیلمه سی بیزی داها دوشوندورمه لیدیر!!
سیز دوننه قدر آمئریکانی بؤلگه ده کوردلره یاردیم ائتمک ده قیناییردینیز. ایندی ایسه آمریکانین سوریه ده چکیلمه سین گونئی آزربایجانا زیانلی گؤرورسوز!! سیزین تحلیل لرینیزی، هر شئی دن باشی چیخان آلله دا باشا دوشه بیلمکده زورلوق چکیر. یعنی دونن دئیردینیز آمئریکانین سوریه د ه اولماسی پیس و بوگون آمئریکانین سوریه دن چکیلمه سی پیس دیر، چون آمئریکا چکیلیرسه 10 میللرجه تروریست هارا آخاجاقلار، دئیه سوآل وئریرسینیز؟!! آلله سیزه یا بیر آز اینصاف وئرسین یا دا بیر آز تحلیل گوجو باغیشلاسین.
ایکی: یازیزسیز کی، ایندی که آمئریکا سوریه دن چکیلیر 10 مین لرجه سیلاحلی تروریست هارایا آخاجاقلار؟!!
سیزین حوادیث دن بو آنالیزینیز بلکه دونیانین ان عجایب آنالیزلریدن سایلابیلیر؛
بیرینجی سی، یا سیزین بؤلگه ده اولان مسئله لردن خبرینیز یوخدور و یا اؤزونوزو خبرسیزلییه وورورسونوز. چون قورخو و احتیاتلا بو ذهنیتی یایرسینیز کی گویا آمئریکانین سوریه ده اولماسی دونه نه قدر گونئی آزربایجانی قورویورموش!! و یا آمئریکانین بؤلگه اولماسی گونئی آزربایجانی قورما رولو اوینایرمیش!!
ایکینجی سی، اونودورسونوز کی آمئریکا سوریه دن چیخیرسا آدین چکدیین 10 مین لرجه تروریست اردوغانین سوریه یه اوردو چکمه سی ایله جان هایندا قالاجاقلار و بیر یئریه آخدی ماخدی لاری اولابیلمز و اردوغان سوریه نین قوزئینه اوردو چکمه سی ایله سوریه نین گله جک فئدرال دئولتین قورولماسینا جیددی انگل تؤره دیر. ذاتا اردوغانین آماجی دا بودور. اونون باشقا آماجی تورکیه نین یئرل سئچیم لرینده اؤزونو ساواش قهرمانی گؤسترمک و یازیق خالقین تورکیه ده رای لرین آلماق دیر.
اردوغانین سوریه سیاستی، یالنیز سوپر ارتجاعی (دینچی) قوروپلارا یاردیم ائتمک له تورکیه یه و بولگه یه فلاکت گتیرمه سی دئیر، بلکه او سیاستین بیر پارچاسیدا سوریه ده فئدرال دئولتین قورولماسینا انگل تؤرتمه آماجی ایله آپاریلمیشدیر. بو سیاستین اینانیلماز درجه ده نئقاتیو ائتگیسی گونئی آزربایجان دا تورک میللی حرکاتی نی دا قاپاساماقدادیر. چون ایران دا دا تورک میللی دئموکراتیک حرکاتی گونئی آزربایجان دا و ایران دا بیر فئدرال دئولتین قورولماسی اوچون موباریزه ائدیر.
اردوغان و تورکیه حاکمیتی، ایران دئولتی ایله برابر بؤلگه ده میللی موقدراتی تعیین ائتمک اوچون مبارزه ائدن خالق لارین قارشیسیندا ان گئریجی حاکیمت لردیرلر. تورکیه نین سوریه پولیتیکاسی دا آدین چکدییم گئریجی سیاستین زنجیرلرینین بیر حلقه سی دیر. باشقا دئیش له سیزین تورکیه حکومتینه طرفدار اولدوغونوز گونئی آزربایجان دا گئدن میللی دئموکراتیک حرکاتینا سؤز قونوزسو اولونجا سیز اونلا بیر ضدیت موقعین ده دورورسونوز. چون سیز میللی حاقلارا قارشی دوران بیر حکومتی (آکپ نی) دستک له ییرسینز.
سیز اونودورسونوز کی اردوغان ایکی سببه گؤره سوریه نین شمالیندا حربی موداخیله ده بولونور، بیرینجی سی سوریه ده فئدرال دئولتین قورولوشونا انگل اولسون، ایکینجی سی یئرل سئچیم لرده اؤزونو ساواش قهرمانی گؤسترمک له یازیق جمعیتین سس لرین (رای لرین) آلسین. آمما تورکیه نین سوریه سیاستی ده بیر داها فاجعه لی سونوج اولاجاقدر، اودا سوریه ده فئدرال بیر دئولتین قورولوشو انگلله نیرسه سوریه یه ده بشار اسدین توتالیتر رژیمینین بیرداها دا قورولماسینا یاردیمجی اولاجاقدیر. بو سیاستین گرچک لشمه سینده سیزین ده پاینیز اولاجاقدیر.
2018-12-21
