گنج له ریمیزین ائعتیراضلاری گؤزله نیلیر
یونس شاملی
آزربایجانین تیراختور ایله تئهرانین نئفت اویونو خوش و دوزگون سونوجلانمادی. اویونون، باخمییاراق کی تیراختور 3-1 تئهرانین نئفت یندن اؤنده ایدی، آمما ایکینجی یاریسیندا یئرینده ن- کؤکونده ن تیراختور اوچون هئچ خوش و اولوملو گئچمه دی. اویونون حاکیمی تیموریانی اویوندان چیخارتماسی اویونون گئدیشاتین یؤنون تمامیله دئیشدی. تیراختور تمامیله نئفت اویونجولاری طرفیندن سیخینتی دا قالدی و او عرفه ده ده نئفت ایکی قول وورمایا نائل اولوب، تیراختورلار برابر بیر دورمدا دوام ائتدی.
برابر دوروم تیراختورون شامپیون اولماغی اوچون گینه ده بیر شانسی سایلیردی. اگرسه او بیری پارالل اویون (یعنی سپاهان و سایپا اویونو) برابر اولسایدی، تیراختورون شامپیولوغو قطعی ایدی. آمما تیراختور، نئفت ایله برابر اولورسا، و سپاهان، سایپایا غلبه چالسا، تیراختور یوخ بلکه سپاهان شامپیونلوق عنوانینا نائل اولوردو. سونونج ائله ده اولدو. آمما تیراختور- نئفت اویونون سونوجوندا ان اؤنملی سی سون 10 دقیقه سینده ایدی. بو 10 دقیقه ده استادیوم دا اولان مونیتور، کی پارالئل موسابیقه نین ده سونوج لارین گؤسته ریردی تمامیله سؤنور، تیم لرین پالتار دئیشمه یئرینده اولان و پارالل موسابیقه نی راپور ائلیین مونیتورلاردا سورنور، موبایل تیلیفون علاقه لری کسیلیر و اس ام اس مئساژلارینین گؤنده رمه سی ده مومکون اولمور. بو آن دا شرایط شایعه یایلماق اوچون اویقون دور. سپاهان و سایپا تیم لرینین سونوج بَلیرسیزلیگی، قاباقجادان پیلانلامیش شایعه فورموندا وهمان آنلادا یایلیر. هیجانلی تیراختور طرفدارلاری، او ایسترئس آنلاریندا بو شایعه نین یایلماسینا سبب اولورلار و شایعه بیر خبر کیمی تیراختورون اویونجولارینا و مشقچی سینادا یئتیشیر. بو اساسدا تیراختور مشقچی سی یئنی بیر سیاست گؤتورور. او بو ظنن ایله کی تیراختورون برابر سونوجلا موسابیقه نی بیتریمه سی، تیراختورون قهرمانلیغینا یولو آچیر دئیه، هجوم خطیندن بیری آزالدیر و مدافعه خطینه بیرین آرتیریر. تیراختور – نئفت اویونونون بیتن آنلاریندا، تیراختورون اویونجولارینا و اوندان گئنیش و اؤنملی سی ایستادیومدا اولان 90 مین طرفدارینا بیر نئچه دقیقه "شامپیونلوق سئوینجی" ایله "شوک دورمو" و همان آنلاردا "شامپیون اولمادیغی" آغیر آنلاری یاشاتدیریر. هم تیراختور ایونجولاری، اونون مشقچی سی و 90 مین اینسان اؤزلرینی اویونجاق کیمی داورانیلما ایچه ریسینده گؤرورلر. تئهرانین نئفت مشقچی سی بو شیوه یه جیددی اعتراض ائدرکن بو رفتاری "چیرکین و غیراختصاصلی" بیر حرکت آدلاندیریر. آمما نه یازیق کی چیرکین اللر بو اویونبازلیغی تبریزه گتیریرلر و آزربایجان تیراختورونون 90 میل طرفدارینین قلبی قیریب، اهانته معروض قویورلار.
تبریزده و آزربایجانین باشقا شهر و کندلرینده بو چیرکین حرکته قارشی اعتراضلا فرقلی فورمالاردا دوام ائتمکده و فورمالاشماق عرفه سینده دیرلر. تبریز شهریندن یوروشلر (تظاهرات) راپورلانیب و ویدئو کلیپ لر بو اعتراضی حرکتلری سوسیال مئدیادا یایلمیش دیر.
تیراختورون طرفدارلارینین حیسسی یالنیز بیر فوتبال تیمی نین آیاقلانماسی یوخ، بلکه بیر میللتین (آزربایجان دا تورک میللتی نین) آیاقلانماسی حیسی کیمی گؤروب، اونو قیمت لندیریر. ائله بونا گؤره ده تیراختورون بو اویونوندان سونرا، تبریز، اورمیه، زنجان، اردبیل و باشقا شهر و کندلرده اعتراض لار گؤزله نیلیر. تیراختور طرفداری، عدالتی یالنیز تیراختور اویونلاریندا یوخ، میللی حقوق لار آلانیندادا گؤسته رمه یه چالیشیر. تیراختور طرفدارلاری، تورک میللتی نین گونئی آزربایجان دا گئدن میللی دئمکراتیک حرکاتی نین گنج و اعتراض قولو سایلیر. بو گنج لرین اعتراضی ایرانین فارس دئولتینه تورک خالقی نین اعتراضی سایلیر. تیراختور طرفدارلاری، تورک گنج لرینین اعتراض دئمک دیر. ایندی تبریزده و گونئی آزربایجان ین هر بیر شهر و کندینده سون حاقسیزلیق و سون اهانتلی رفتارا قارشی "گنج له ریمیزین ائعتیراضلاری گؤزله نیلیر".
20150517
